“Nje grup i madh studentesh te ekselences moren karten e anetaresise ne PS sot ne pervjetorin e Fressh:-) Flm e mirenjohje per inkurajimin”.

Ky është statusi në profilin e vet në “Facebook” i kryeministrit Edi Rama. Lajmi na thotë se ata që vlerësohen si studentët më të mirë, që nga sot janë bërë me një teser partie në xhep. Kanë marrë teserën e partisë që është në pushtet, të një partie që bashkë me të tjerat është gjeneratori i kalbëzimit që ka prekur shoqërinë.

Angazhimi në politikë nuk ka asgjë të keqe, madje duhet nxitur. Por për aq sa dihet, në moshën e jetës studentore njeriu ka prirjen të vërë  në diskutim shumëçka, të kontestojë dhe të mos pajtohet lehtë me gjërat. Ndaj edhe organizimet studentore janë më të kollajta. Me sa duket gjërat kanë marrë kahje tjetër në Shqipëri: studentët më të mirë kanë si model dhe e gjejnë veten te pushteti, te partia që garanton me sa duket një perspektivë pune dhe asgjë më shumë se kaq.