Policia suedeze arrestoi të martën 14 persona të dyshuar se po planifikonin sulme ndaj një qendre azilkërkuesish rreth 60 km në jug të Stokolmit. Autoritetet njoftuan se ndalimi i këtyre personave u bë pasi në automjetet e tyre u gjetën sende të forta si sëpata, thika apo shufra hekuri. Në një intervistë për AFP, zëdhënësi i policisë suedeze tha nga dokumentat e identifikimit që iu gjetën të arrestuarve, rezultoi se ata ishin shtetas të huaj, një pjesë e tyre me kombësi polake.
Kjo nuk është hera e parë që autoritetet suedeze përballen me zemëratën ndaj emigrantëve. Pak javë më parë, persona të maskuar, të dyshuar si huliganë neo-nazistë, shpërndanë në qendër të Stokolmit fletushka kundër refugjatëve. Suedia është një nga vendet që kanë pritur më së shumti azilkërkues, rreth 163 mijë vetëm vitin e shkuar.