E mbani mend Donald Lunë? Nëse jo ua kujtojmë ne: ka qenë ambasador i SHBA në Shqipëri. Ishte ai që sillej si Guvernator i këtij vendi të mrekullueshëm siç edhe ironizonte kur binte rasti, dhe ndoshta edhe e mendonte me të vërtetë. Fliste për reformën në drejtësi, pastaj dërgonte sms shantazhuese deputetëve të Parlamentit ta votonin, organizonte protesta, na quante dele. Të gjitha i bëri Donaldi që u ndje pakëz mbret në këtë qoshk të Europës Juglindore.

Dikush mund të thotë se nuk kemi çfarë të bëjmë, jemi të vegjël. Mirëpo kjo është relative. Shikoni se çfarë i ka ndodhur Donaldit në Kirgizi, një nga ish-republikat sovjetike të Azisë Qendrore.

Presidenti Trump ka vedosur ndalimin e lëvizjes së krigizëve në SHBA, përveç nigerianëve, birmanezëve, eritreasve, sudanezëve dhe tanzanezëve. Ministria e Jashtme e Kirgizisë që i thonë edhe Kirgizstan, ka thirrur ambasadorin e SHBA në vend, shkëlqesinë e tij Donald Lu për t’i kërkuar shpjegime për vendimin e presidentit Trump.

Duhet ta themi: Trump ia del ta vërë në pozitë çdo njeri racional. Ndaj Lu thjesht ka gënjyer. Sipas AFP-së ka thënë se vendimi lidhet me faktin se Kirgizia ka dështuar në zëvendësimin e pasaportave aktuale me ato biometrike. Mirëpo Ministria e Jashtme kirgize nuk e ka pranuar këtë qëndrim duke sjellë si argument faktin se ka shumë vende pa pasaporta biometrike që nuk e kanë këtë kufizim. Ministria ka vazhduar me cilësimin se marrëdhëniet kirgizo-amerikane janë dëmtuar me këtë vendim të Trump.

Nëse kërkon në Google me Donald Lu, dalin me qindra artikuj për qëndrimin e tij në Shqipëri dhe më pak se 10 për qëndrimin e tij në Kirgizi, një vend me gati 5.5 milionë banorë.

Dinjiteti nuk ka të bëjë me përmasat, por me vlerat ku beson dikush. Në Shqipëri, ku përralla e shqiponjës, autoktonisë dhe trimërisë tregohet nga mëngjesi në darkë, lëpirja ndaj çdo të huaji ka arritur në shkallë të pamigjiueshme. Dhe kjo lëpirje ka avokatinë e palodhshme të hienave të plakura të politikës dhe medias, kutërbimi i të cilave është një ndër shkaqet pse shumë njerëz po ikin nga ky vend. Sa për Donaldin i lutemi të na ndihmohjë me një video mesazh: si bën delja kirgize?