Aksidenti tragjik i ndodhur disa ditë më parë në aksin Plepa-Kavajë, ku humbën jetën dy fëmijët 3 dhe 5 vjeç, të cilë po udhëtonin bashkë me nënën e tyre për të takuar babain e mbajtur në paraburgim për një ndërtim pa leje, po zbulon një skandal të vërtetë, i cili duhet patjetër të marrë në përgjegjësi ministrin Edmond Haxhinasto. Sot Tv Klan raporton shkresën që Policia Rrugore i ka nisur Autoritetit Rrugor Shqiptar për të eliminuar ndërprerjet e barrierave në këtë aks rruge. “Rruga Golem- Kavajë – Rrogozhinë është e papërfunduar , Unaza në fshatin Gosë vazhdon të jetë problematike, ngushëtimi i korsive në drejtim të lëvizjes Kavajë- Rrogozhinë është i pashoqëruar me masat përkatëse, sinjalizime rrugore të pamjaftueshme, pa ndriçim, mban pjesërisht ujë mbi sipërfaqen e saj. Mungojnë plotësisht sinjalizimet rrugore horizontale, vertikale , tabelat treguese dhe tabelat “ STOP”, daljet në rrugë kryesore janë problematike dhe të pashoqëruara me korsi ngadalësimi”, raporton Tv Klan.

Ky lajm u bë i ditur edhe dje përmes një prononcimi të Drejtorit të Policisë Rrugore, Mithat Tola, që pohoi shkresën. Pra Ministria e Transporteve ka lejuar qëarkullimin në kushte sigurie jashtë çdo standardi. A do të hapë vallë Prokuroria hetime për këtë çështje? Mbetet për t’u parë. Por skandali bëhet edhe më i madh kur njoftohet se devijimi i kryer në vendin e aksidentit dhe ndërprerja e barrierës është bërë për të favorizuar nja pikë karburanti. E cila siç raporton sot i njëjti televizion është në pronësi të Shefit të Kabinetit të Ministrit të Transporteve. “Mbrojtëset anësore të autostradës Plepa – Golem, që u bënë shkak për vdekjen e dy fëmijëve në aksidentin e së shtunës, nuk janë vendosur për të favorizuar një karburant, i cili rezulton të jetë në pronësi të babait të një zyrtari të lartë në Ministrinë e Transporteve. Kjo pikë karburanti është e regjistruar në emrin e shoqërisë PIENVIS, me pronar Pilo Kërin, babain e Krislen Kërit, shefit aktuali të kabinetit të Ministrit të Transporteve, Edmond Haxhinasto. Në dokumentat e Qendrës Kombëtare të Regjistrimit thuhet se kjo shoqëria në pronësi të Pilo Kërit ushtron aktivitetin e tregtimit me pakicë të karburanteve, vajrave lubrifikantë e autogaz, 2.8 kilometër nga rrethrrotullimi i Malit të Robit. Këto të dhëna korrespondojnë pikërisht me vendin ku ka ndodhur aksidenti i së shtunës. Procedimi penal është regjistruar edhe për Autoritetin Rrugor Shqiptar, një institucion në vartësi direkte të Ministrisë së Transporteve, pasi dyshohet se Autoriteti Rrugor Shqiptar e ka marrë në dorëzim rrugën pa u plotësuar me elementët e domosdoshëm të sigurisë, siç e kërkon ligji”, informon Klan.

Ka pra një akt favorizimi që shkel ligjet, ka një vlerësim të Policisë Rrugore që konfirmon situatën e sigurisë si të papranueshme, ka pastaj edhe shef kabineti të një ministri, i cili nuk mund të vazhdojë t’ia hedhë duke u fshehur. Kanë humbur dy jetë njerëzish dhe një ekspertim për të gjykuar nëse aksidenti është pasojë e këtyre ndërhyrjeve është i domosdoshëm. Të kemi parasysh se viktima po shkonte në burg tek i shoqi, i ndaluar për ndërtime pa leje, nga një shtet që është Strukturë Informale në tërësi.

http://tvklan.al/web/skandal-mbrojteset-ne-autostrade-nuk-u-vune-se-kar…