Gjykatësja Majlinda Andrea është kthyer nga Italia, por pa bashkëshortin e vet, Odhisea. Kështu u raportua sot për gjykatësen e Gjykatës së Lartë, e cila akuzohet për korrupsion në vlerën e 50 mijë dollarëve. Ajo është pezulluar nga detyra nga Kolegji Penal i Gjykatës së lartë, pas kërkesës së Prokurorisë, e cila siç raporton sot “Abc News”, disponon pamje filmike dhe video, ku paraqitet bashkëshorti i saj, Odhisea, që mbush një qese me para.

“Odhise Andrea, është filmuar dhe fotografuar duke marr qesen e mbushur me 50 mijë euro nga Petraq Dashi me cilësinë e ndërmjetësit.  Abc News ka mësuar se Prokuroria e Përgjithshme me ndihmën e agjentëve të Policisë së Shtetit, ka dokumentuar me cilësinë e provës, fotografimit dhe videon e regjistruar kur Këshilltari në Komisionin e Sigurisë Kombëtare në Kuvend merr paratë. Këto para, sipas akuzës, vetëm pak minuta para takimit mes Odhise Andreas dhe Petraq Dashit, ky i fundit i ka marr në dorëzim nga dy të dyshuarit Ilia Çabiri dhe Eleni Lino të cilët janë filmuar”, raporton televizioni në fjalë.

Çështja është hapur pas dyshimeve se dy shtetas nga Saranda kanë nisur të interesohen pranë gjykatës për të marrë pronën e tyre 40 ha. “Burimet thonë se me datë 11 korrik, një ditë para shpalljes së vendimit në dhomën e këshillimit nga tre gjyqtarët me relator Maljinda Andrea, dy sarandiotët Ilia Çabiri e Eleni Lino i dorëzojnë paratë ndërmjetësit Petraq Dashi. Të nesermen, me datë 12 korrik, ashtu siç u kishin premtuar vendimi jepet në favor të dy sarandiotëve”, vijon “Abc News”.  

http://www.abcnews.al/lajme/aktualitet/2/72762